Skálholtskirkja og umhverfi hennar skyndifriðuð

Húsafriðunarnefnd er búin að skyndifriða Skálholtskirkju, Skálholtsskóla og nánasta umhverfi. Endurbygging Skálholtsbúðar hefur því verið stöðvuð en hún hófst á nýjan leik í gær.

Nikulás Úlfar Másson, forstöðumaður nefndarinnar, segir á mbl.is að þetta þýði að stöðva verði framkvæmdir við endurbyggingu Þorláksbúðar.

Hann segir að ákvörðunin hafi verið tekið á fundi nefndarinnar í gær. Nú sé unnið að því að tilkynna þetta hlutaðeigandi aðilum. En Húsafriðunarnefnd tilkynnti mennta- og menningarmálaráðherra um þessa ákvörðun á fundi sínum nú í morgun.

„Við erum að vinna í því núna að tilkynna hlutaðeigandi aðilum þessa ákvörðun nefndarinnar. Sem eru eigendur, sveitastjórn og lögreglustjóri,“ segir Nikulás.

Hann segir að samkvæmt mati nefndarinnar þá séu kirkjan og skólinn meðal vönduðustu bygginga 20. aldar á Íslandi. „Við teljum það að þessar byggingar í Skálholti myndi eitt fegursta rými í nútímabyggingarlist á landinu, þ.e. manngert rými. Þegar skólinn er hannaður, þá er hann hannaður með miklu tilliti teknu til kirkjunnar. Þarna er gífurlega fallegt samtal á milli sem við teljum að bygging þessa húss [Þorláksbúðar] á þessum stað komi til með að rjúfa. Við teljum að það sé það mikið í húfi þarna að þetta beri að vera friðað,“ segir Nikulás.

Aðspurður segir hann að friðunin gildi í tvær vikur. „Innan tveggja vikna þá þarf ráðherra að taka endanlega ákvörðun um það hvort þessi hús skuli vera friðuð eða ekki.“

Vilji ráðherra ekki friða húsin áfram þá nái málið ekki lengra. Nikulás á hins vegar ekki von á því að ráðherra málið muni þróast á þann veg.

Frétt mbl.is