Sjúkraflutningamenn Heilbrigðisstofnunar Suðurlands hafa séð um verklega kennslu á grunnnámskeiði í sjúkraflutningaskólanum sem lýkur í næstu viku.
Kennslan hefur farið fram í fyrirlestrasal Heilbrigðisstofnunar Suðurlands á selfossi en í kvöld var verkleg æfing í samvinnu við Brunavarnir Árnesinga þar sem sviðsett var umferðarslys og bjarga þurfti sex slösuðum úr tviemur bílum.
Verklegi hlutinn á Selfossi er fjarnámskeið frá sjúkraflutningaskólanum á Akureyri þar sem nemendur hlýða á fyrirlestra á netinu í gegnum fjarfundabúnað. Verklegar lotur fara svo fram þrisvar sinnum á meðan námskeið stendur.
Markmið námskeiðsins er að gera nemendur færa um að meta ástand mikið veikra og slasaðra sjúklinga, taka ákvörðun um og beita allri nauðsynlegri og viðeigandi bráðameðferð.
Í verklegri kennslu fá nemendur meðal annars þjálfun í öndunarhjálp, endurlífgun, skoðun og mat, almenna flutningstækni, skráningu og skýrslugerð, fæðingarhjálp, meðhöndlun sára og áverka svo eitthvað sé nefnt.
Nemendur koma af öllu landinu, þó meirihluti þátttakanda séu Sunnlendingar.