Selfoss 2 tók á móti Fram 2 í 1. deild karla í handbolta í Set-höllinni Iðu í dag. Eftir háspennu á lokakaflanum sigraði Selfoss 33-32.
Selfoss var skrefinu á undan megnið af fyrri hálfleiknum, Framarar náðu að komast yfir eftir rúmt korter en Selfyssingar stilltu sig af og náðu forystunni aftur. Staðan var 18-15 í leikhléi.
Gestirnir voru ákveðnari í upphafi seinni hálfleiks og jöfnuðu 24-24 og eftir það var leikurinn í járnum. Lokakaflinn var æsispennandi en Selfyssingar áttu lokaorðið og sigruðu með einu marki.
Aron Leo Guðmundsson og Skarphéðinn Steinn Sveinsson voru markahæstir Selfyssinga með 8 mörk, Einar Bragi Ágústsson skoraði 4, Bartosz Galeski og Dagur Rafn Gíslason 3, Bjarni Valur Bjarnason og Jónas Karl Gunnlaugsson 2 og þeir Arnar Gauti Þorkelsson, Kári Einarsson og Þormar Sigurðsson skoruðu allir 1 mark. Garðar Freyr Bergsson varði 13 skot í marki Selfoss.
Þetta var sjötti sigur Selfoss 2 í röð en liðið er í 3. sæti deildarinnar með 16 stig en Fram 2 er í 11. sætinu með 3 stig.