Sjóstökk getur verið hættulegur leikur

Sjóstökk eða stökk í höfnina hefur í gegnum tíðina verið vinsæl iðja hjá ungu fólki. Í dag er mikið um að unglingar skori hver á annan á samfélagsmiðlum að stökkva í sjóinn en með því er verið að magna upp hættu á slysum.

Þetta segja Gunnsteinn R. Ómarsson, bæjarstjóri Ölfuss, Hjörtur B. Jónsson, hafnarstjóri Þorlákshafnar og Ásgeir Guðmundsson, formaður Björgunarsveitarinnar Mannbjargar, í tilkynningu á heimasíðu Ölfuss.

“Þegar fólk stekkur í sjóinn fylgir því töluverð hætta á krampa og er þá viðkomandi algerlega óhæfur til að bjarga sér sjálfur og snör hand- og sundtök þjálfaðra aðila þarf til að vel fari í slíkum tilfellum.

Þá er mjög varasamt að stökkva úr mikilli hæð en því hærra sem stokkið er þeim mun meiri hætta er á slysi. Mikil hætta er á ofkælingu ef verið er lengur í sjónum en þrjár mínútur og því er ákaflega brýnt að aldrei sé farið frá hafnarkantinum, s.s. út á hafnargarðana, þar sem mun erfiðara getur verið að komast upp úr sjónum og sterkir straumar geta borið fólk frá landi,” segir í tilkynningunni og því bætt við að það sé algjört frumskilyrði að fullorðnir séu viðstaddir þennan hættulega leik, til að grípa inní ef illa fer.

“Foreldrar eru hvattir mjög alvarlega til að ræða við börn sín um þessi mál.”