Gaulverjabæjarvegur er lokaður en gríðarlegur sjógangur er við Stokkseyri og Eyrarbakka. Sjór og grjót gengur yfir veginn og Stokkseyrarbryggja er á kafi í sjó.
Þegar sunnlenska.is var á Stokkeyri um klukkan 22 í kvöld gengu svakalegar fyllur yfir bryggjuna og alveg upp að vegg í Hólmarastarhúsinu.
Á Eyrarbakka hefur sjór gengið langt upp á land, yfir sjóvarnargarðinn meðal annars við björgunarsveitarhúsið og Skálann.
Það er enn að falla að en háflóð er um klukkan 22:40.
Björgunarsveitin Björg á Eyrarbakka beinir því til íbúa á Eyrarbakka og Stokkseyri að vera ekki á ferðinni í kvöld og nótt. Ef einhver þarfnast aðstoðar á að hringja í 112.
