Fólkið sem var í smárútunni sem valt á Skeiðarársandi í kvöld var flutt með tveimur þyrlum á sjúkrahús í Reykjavík.
Samkvæmt upplýsingum frá lögreglunni á Suðurlandi voru allir þeir slösuðu með meðvitund, en einhverjir þeirra eru beinbrotnir.
Fyrri þyrlan fór í loftið frá slysstaðnum laust fyrir klukkan 21 með fjóra slasaða og seinni þyrlan fór af vettvangi með þrjá til viðbótar 40 mínútum síðar.
Sjúkraflugvél frá Akureyri lenti á Höfn í Hornafirði og var tilbúin til flutnings en ekki þótti skynsamlegt að aka með þá slösuðu 130 km leið frá vettvangi til Hafnar. Sjúkraflugvélin gat hvorki lent á Fagurhólsmýri eða í Skaftafelli þar sem flugvellirnir þar eru ekki með bundnu slitlagi og henta því ekki fyrir flugvél af þessu tagi.
Rannsóknarvinna lögreglu á vettvangi er enn í gangi og má búast við umferðartöfum á staðnum.