D-listi Sjálfstæðismanna og S-listi Samfylkingarinnar og óflokksbundinna hafa komist að samkomulagi um að hefja formlegar viðræður um myndun meirihluta í bæjarstjórn Hveragerðis.
„Niðurstaða kosninganna sýnir skýrt ákall kjósenda um breytingar, ný vinnubrögð og ábyrga forystu í þeim verkefnum sem fram undan eru. D-listinn hlaut 43,9% fylgi, 869 atkvæði og bætti við sig manni. S-listinn hlaut 12,9% fylgi, 256 atkvæði og náði inn fulltrúa í bæjarstjórn eftir að hafa boðið fram á ný eftir margra ára fjarveru. Samanstanda því 1.125 atkvæði (56,8%) að baki listunum tveimur,“ segir í tilkynningu frá D- og S-listunum.
Þar segir ennfremur að í samtölum fulltrúa listanna hafi komið skýrt fram að í mörgum mikilvægum málaflokkum séu áherslur þeirra samhljóða og víða megi finna sameiginlega sýn á framtíð og uppbyggingu bæjarfélagsins.
„Viðræðurnar munu fara fram af ábyrgð og með það að markmiði að kanna hvort unnt sé að mynda farsælan og málefnalegan meirihluta í bæjarstjórn sem geti aukið traust meðal íbúa, svarað ákalli um breytingar og öfluga forystu í stjórnun bæjarfélagsins,“ segir ennfremur í tilkynningunni.