Talsverðar breytingar hafa orðið á fylgi stjórnmálaflokkanna í Suðurkjördæmi á milli mánaða en Sjálfstæðisflokkurinn nýtur mests fylgis í kjördæminu samkvæmt nýjasta Þjóðarpúlsi Gallup, sem tekinn var í apríl.
Sjálfstæðisflokkurinn er með 29,3 prósent fylgi og hækkar um 5,1 prósent á milli mánaða á meðan Samfylkingin lækkar um 5 prósent.
Miðflokkurinn er með 23,8 prósent fylgi og lækkar um 1,6 prósent á milli mánaða en Samfylkingin er komin niður í 17,3 prósent.
Þar fyrir neðan bætir Flokkur fólksins lítillega við sig og er í 8,2 prósentum, Framsókn og Viðreisn bæta við sig og eru báðir flokkar með 7,8 prósent fylgi.
Fylkgi Vinstri grænna minnkar um 1,4 prósent og fer niður í 3,2 prósent. Aðrir flokkar eru með mun minna fylgi; Píratar, Sósíalistaflokkurinn og aðrir eru undir 1,7 prósentum.
Yrðu þetta niðurstöður Alþingiskosninga fengju Sjálfstæðisflokkurinn og Miðflokkurinn 3 kjördæmakjörna þingmenn í Suðurkjördæmi, Samfylkingin 2 og Flokkur fólksins 1. Framsókn og Viðreisn myndu ekki ná inn kjördæmakjörnum þingmanni.
Gallup fékk 529 svör frá kjósendum í Suðurkjördæmi í netkönnun sem gerð var dagana 1. til 29. apríl og birtir sunnlenska.is niðurstöðurnar úr Suðurkjördæmi í samstarfi við RÚV. Einstaklingar í úrtaki voru handahófsvaldir úr Viðhorfahópi Gallup.
Á landsvísu
Helstu breytingar milli mánaða á landsvísu eru að fylgi Sjálfstæðisflokksins eykst um nær 2 prósentustig. Litlar breytingar eru á fylgi annarra flokka milli mánaða og eru þær ekki tölfræðilega marktækar. Tæplega 29% kysu Samfylkinguna ef kosið yrði til Alþingis í dag, ríflega 21% Sjálfstæðisflokkinn, nær 19% Miðflokkinn, tæplega 11% Viðreisn og rúmlega 5% Framsóknarflokk, Flokk fólksins og Vinstri græn. Liðlega 2% segjast myndu kjósa Pírata og Sósíalistaflokk Íslands. Ríflega 6% myndu skila auðu eða ekki kjósa og næstum 13% taka ekki afstöðu eða vilja ekki gefa hana upp. Slétt 49% þeirra sem taka afstöðu styðja ríkisstjórnina.