Sjálfstæðisflokkurinn er með svipað fylgi á milli mánaða í Suðurkjördæmi en fylgi Samfylkingarinnar eykst í kjördæminu samkvæmt nýjasta Þjóðarpúlsi Gallup, sem tekinn var í júlí.
Sjálfstæðisflokkurinn er með 30,3 prósent fylgi og lækkar lítillega á milli mánaða en Samfylkingin er með 22,8 prósent fylgi og hækkar um rúm 4 prósent. Miðflokkurinn dalar um rúm tvö prósent og er með 19,5 prósent fylgi.
Framsókn bætir við sig og er með 8,4 prósent, Viðreisn er með svipað fylgi og í júní 6,8 prósent en Flokkur fólksins fer niður um tvö prósent, niður í 5,2 prósent. Þessir tveir ríkisstjórnarflokkar myndu ekki ná inn kjördæmakjörnum þingmanni í Suðurkjördæmi ef þetta yrðu niðurstöður kosninga.
Fylgi Vinstri grænna dalar lítillega og er 2,9 prósent en Píratar, Sósíalistaflokkurinn og aðrir eru undir 2,5 prósentum.
Yrðu þetta niðurstöður Alþingiskosninga fengju Sjálfstæðisflokkurinn og Samfylkingin 3 kjördæmakjörna þingmenn í Suðurkjördæmi, Miðflokkurinn 2 og Framsókn 1.
Gallup fékk 623 svör frá kjósendum í Suðurkjördæmi í netkönnun sem gerð var dagana 1. júlí til 3. ágúst og birtir sunnlenska.is niðurstöðurnar úr Suðurkjördæmi í samstarfi við RÚV. Einstaklingar í úrtaki voru handahófsvaldir úr Viðhorfahópi Gallup.
Á landsvísu
Litlar breytingar eru á fylgi flokka milli mánaða, eða á bilinu 0 – 1,7 prósentustig. Nær 28% kysu Samfylkinguna ef kosið yrði til Alþingis í dag, ríflega 25% Sjálfstæðisflokkinn, tæplega 15% Miðflokkinn, rösklega 11% Viðreisn, næstum 6% Framsóknarflokkinn, rúmlega 5% Flokk fólksins, nær 4% Vinstri græn, liðlega 3% Sósíalistaflokk Íslands og rúmlega 2% Pírata. Ríflega 6% myndu skila auðu eða ekki kjósa og næstum 13% taka ekki afstöðu eða vilja ekki gefa hana upp. Rúmlega 50% þeirra sem taka afstöðu styðja ríkisstjórnina.