Sjálfstæðisflokkurinn er með svipað fylgi á milli mánaða í Suðurkjördæmi en fylgi Miðflokksins og Samfylkingarinnar dalar í kjördæminu samkvæmt nýjasta Þjóðarpúlsi Gallup, sem tekinn var í maí.
Sjálfstæðisflokkurinn er með 30,5 prósent fylgi og hækkar lítillega á milli mánaða og Miðflokkurinn er með 21,6 prósent fylgi og missir um 2 prósent á milli mánaða. Samfylkingin missir tæp 3 prósent og er með 18,4 prósent fylgi.
Framsókn missir tæp 2 prósent og er með 7,7 prósent en Flokkur fólksins og Viðreisn bæta við sig fylgi og er Flokkur fólksins nú með 7,2 prósent og Viðreisn 6,9.
Fylgi Vinstri grænna eykst lítillega og er 3,3 prósent en Píratar, Sósíalistaflokkurinn og aðrir eru undir 2,1 prósentum.
Yrðu þetta niðurstöður Alþingiskosninga fengi Sjálfstæðisflokkurinn 4 kjördæmakjörna þingmenn í Suðurkjördæmi, Miðflokkurinn og Samfylkingin 2 og Framsókn 1. Flokkur fólksins og Viðreisn myndu ekki ná inn kjördæmakjörnum þingmanni.
Gallup fékk 562 svör frá kjósendum í Suðurkjördæmi í netkönnun sem gerð var dagana 1.-30. júní og birtir sunnlenska.is niðurstöðurnar úr Suðurkjördæmi í samstarfi við RÚV. Einstaklingar í úrtaki voru handahófsvaldir úr Viðhorfahópi Gallup.
Á landsvísu
Nokkrar breytingar eru á fylgi flokka milli mánaða. Fylgi Miðflokks, Samfylkingar og Framsóknarflokks minnkar en fylgi Sósíalistaflokks og Pírata eykst. Breytingar á fylgi annarra flokka (0,7-1,4 prósentustig) eru ekki tölfræðilega marktækar. Ríflega 26% kysu Samfylkinguna ef kosið yrði til Alþingis í dag, nær 25% Sjálfstæðisflokkinn, liðlega 15% Miðflokkinn, rösklega 11% Viðreisn, ríflega 5% Framsóknarflokkinn, 5% Vinstri græn, tæplega 5% Flokk fólksins, rösklega 4% Sósíalistaflokk Íslands og næstum 3% Pírata. Ríflega 5% myndu skila auðu eða ekki kjósa og rúmlega 12% taka ekki afstöðu eða vilja ekki gefa hana upp. Næstum 51% þeirra sem taka afstöðu styðja ríkisstjórnina, sem er aukning um rúmlega 2 prósentustig milli mánaða.