Litlar breytingar hafa orðið á fylgi stjórnmálaflokkanna í Suðurkjördæmi á milli mánaða en Sjálfstæðisflokkurinn nýtur mests fylgis í kjördæminu samkvæmt nýjasta Þjóðarpúlsi Gallup, sem tekinn var í maí.
Sjálfstæðisflokkurinn er með 30,2 prósent fylgi og hækkar lítillega á milli mánaða og Miðflokkurinn er með 23,7 prósent fylgi, sem er nánast það sama og í apríl. Samfylkingin bætir við sig tæpum 4 prósentum og er með 21,1 prósent fylgi. Samfylkingin virðist taka fylgið af Flokki fólksins, sem missir tæp 4 prósent og nær ekki manni inn á þing.
Framsókn bætir við fylgi sitt og er með 9,4 prósent en Viðreisn tapar fylgi og er nú með 5,7 prósent í Suðurkjördæmi.
Fylgi Vinstri grænna minnkar og fer niður í 2,9 prósent og aðrir flokkar eru með mun minna fylgi; Píratar, Sósíalistaflokkurinn og aðrir eru undir 1,9 prósentum.
Yrðu þetta niðurstöður Alþingiskosninga fengju Sjálfstæðisflokkurinn og Miðflokkurinn 3 kjördæmakjörna þingmenn í Suðurkjördæmi, Samfylkingin 2 og Framsókn 1. Flokkur fólksins og Viðreisn myndu ekki ná inn kjördæmakjörnum þingmanni.
Gallup fékk 685 svör frá kjósendum í Suðurkjördæmi í netkönnun sem gerð var dagana 30. apríl til 31. maí og birtir sunnlenska.is niðurstöðurnar úr Suðurkjördæmi í samstarfi við RÚV. Einstaklingar í úrtaki voru handahófsvaldir úr Viðhorfahópi Gallup.
Á landsvísu
Helstu breytingar milli mánaða eru að fylgi Sjálfstæðisflokksins eykst um liðlega 2 prósentustig og Framsóknarflokksins um rúmlega prósentustig á sama tíma og fylgi Flokks fólksins minnkar um rúmt prósentustig. Litlar breytingar eru á fylgi annarra flokka milli mánaða, eða á bilinu 0,1-1,3 prósentustig, og eru breytingarnar ekki tölfræðilega marktækar. Rösklega 28% kysu Samfylkinguna ef kosið yrði til Alþingis í dag, tæplega 24% Sjálfstæðisflokkinn, næstum 18% Miðflokkinn, tæplega 11% Viðreisn, nær 7% Framsóknarflokkinn og um 4% Vinstri græn og Flokk fólksins. Tæplega 3% kysu Sósíalistaflokk Íslands og næstum 2% Pírata. Ríflega 5% myndu skila auðu eða ekki kjósa og rúmlega 12% taka ekki afstöðu eða vilja ekki gefa hana upp. Tæplega 49% þeirra sem taka afstöðu styðja ríkisstjórnina.