Sjálfstæðisflokkurinn og Samfylkingin bæta við sig talsverðu fylgi í Suðurkjördæmi á milli mánaða samkvæmt nýjasta Þjóðarpúlsi Gallup, sem tekinn var í ágúst.
Sjálfstæðisflokkurinn er með 33,1 prósent fylgi og bætir við sig tæpum 3 prósentum. Samfylkingin bætir svipuðu við sig og er með 25,5 prósent fylgi. Miðflokkurinn dalar um tæp tvö prósent og er með 17,8 prósent fylgi.
Viðreisn tapar fylgi
Framsókn er með svipað fylgi og áður, 8,0 prósent en Viðreisn lækkar um tæp 4 prósent og er með 4,8 prósent fylgi. Flokkur fólksins er á svipuðu róli og í júlí með 5,4 prósent fylgi.
Fylgi Vinstri grænna breytist ekki og er 2,9 prósent en Píratar, Sósíalistaflokkurinn og aðrir eru undir 1,5 prósentum.
Yrðu þetta niðurstöður Alþingiskosninga fengi Sjálfstæðisflokkurinn 4 kjördæmakjörna þingmenn í Suðurkjördæmi, Samfylkingin 3 og Miðflokkurinn 1. Viðreisn, Flokkur fólksins og Framsókn næðu ekki inn manni.
Net- og símakönnun
Gallup fékk 692 svör frá kjósendum í Suðurkjördæmi í net- og símakönnun sem gerð var dagana 4. til 31. ágúst og birtir sunnlenska.is niðurstöðurnar úr Suðurkjördæmi í samstarfi við RÚV. Úrtakið í netkönnun var tilviljunarúrtak úr Viðhorfahópi Gallup, en úrtakið í símakönnun var tilviljunarúrtak úr Þjóðskrá.
Á landsvísu
Helsta breyting á fylgi flokka milli mánaða er að fylgi við Viðreisn minnkar um tæplega 2 prósentustig. Litlar breytingar eru á fylgi annarra flokka milli mánaða, eða á bilinu 0,3 – 1,7 prósentustig. Tæplega 30% kysu Samfylkinguna ef kosið yrði til Alþingis í dag, nær 27% Sjálfstæðisflokkinn, tæplega 16% Miðflokkinn, næstum 10% Viðreisn, tæplega 6% Framsóknarflokkinn, nær 5% Flokk fólksins, tæplega 4% Vinstri græn, rösklega 2% Sósíalistaflokk Íslands og um 2% Pírata. Nær 5% myndu skila auðu eða ekki kjósa og 13% taka ekki afstöðu eða vilja ekki gefa hana upp. Næstum 50% þeirra sem taka afstöðu styðja ríkisstjórnina.