Hvítur skógarþröstur sást nýlega í Skeiða- og Gnúpverjahreppi, fuglaáhugamönnum til mikillar gleði. Einn af þeim sem náði að festa þröstinn á filmu var Loftur Erlingsson í Tröð, en hann hefur alla tíð haft áhuga á fuglum og horfir mikið eftir þeim þegar hann er á ferðinni.
„Þannig var að nágrannakona mín, Hrafnhildur Ágústsdóttir á Stöðulfelli, setti mynd á Facebook í hádeginu á laugardaginn um Verslunarmannahelgina af hvítum smáfugli sem hún var að velta fyrir sér hvað gæti verið. Ég hringdi strax í hana og fékk leyfi til að koma í garðinn hjá henni og freista þess að ná myndum af þessum furðufugli,“ segir Loftur í samtali við sunnlenska.is.
Loftur segir að það hafi verið mikið rok þennan dag og fuglinn leitað í skjól. „Þegar ég kom að Stöðulfelli og inn í garð, flögraði fuglinn inn í skjólbelti sem er á milli Stöðulfells og Þrándarholts. Ég laumaði mér í gegnum það og sá hann fljótlega gægjast út úr skjólbeltinu hlémegin svo ég settist og beið smá stund þar til hann kom betur fram og fór að gæða sér á þessum rauðu berjum og þá náði ég þessum myndum af honum,“ segir Loftur sem festi kaup á 600mm aðdráttarlinsu fyrir þremur árum. „Ég hef verið að æfa mig að taka fuglamyndir af og til síðan og þetta er allt að koma.“
„Ég þóttist sjá að þarna væri kominn skógarþrastarungi – albínói að ég taldi en spekingarnir eru ekki alveg sammála um hvort hann sé albínói eða bara með litagalla. Skiptir svo sem ekki máli – en fallegur er hann allavega og óvenjulegur,“ segir Loftur að lokum.