Liðsmenn Brunavarna Árnessýslu í Þorlákshöfn slökktu í dag sinueld sem kviknaði austan við Hlíðarvatn í Selvogi.
Útkallið barst laust eftir klukkan tvö í dag. Að sögn Bjarna Ingimarssonar, varðstjóra hjá Brunavörnum Árnessýslu, gekk slökkvistarfið vel en tæpur hektari af gróðri brann.
Bruninn var á opnu svæði og útbreiðsla eldsins var hæg þannig að slökkviliðsmenn áttu ekki í vandræðum með að ráða niðurlögum hans.