Síðastliðinn mánudagsmorgun kl. 7:00 fengu Brunavarnir Árnessýslu tilkynningu frá Neyðarlínunni um að eldur væri í sinu við vegkantinn hjá Alviðru í Ölfusi.
Slökkviliðsmenn á Selfossi brugðust hratt við og náðu að slökkva sinuna á stuttum tíma.
Um er að ræða svæði þar sem gæludýraeigendum er gefin kostur á að jarðsetja dýrin sín. Að öllum líkindum hefur eldur kviknað vegna kertaskreytingar við eitt leiðið.
Síðar sama dag kviknaði eldur í sinu við Þórisstaði í Grímsnesi og fór slökkviliðið í Reykholti á staðinn og á þriðjudagskvöldið kviknaði eldur í sinu í Keflavík, vestan við Þorlákshöfn og fóru slökkviliðsmenn í Þorlákshöfn á vettvang og slökktu eldinn.
Á heimasíðu BÁ segir Kristján Einarsson, slökkviliðsstjóri, ástæðu til að fara sérstaklega varlega með eld í náttúrunni þessa daga þar sem mjög þurrviðrasamt er.