Næstkomandi mánudag munu Sindri, Johan Rönning og Vatn & veitur opna nýja og glæsilega verslun í nýju húsnæði að Austurvegi 69 á Selfossi.
„Viðskiptavinir okkar hafa beðið spenntir eftir þessu og við erum mjög ánægð að geta komið til móts við þarfir þeirra á þennan hátt. Við höfum unnið að þessari opnun undanfarið ár og við erum mjög spennt fyrir að stimpla okkur enn frekar inn á Suðurlandi, framundan er mikill uppgangur og kraftur í sveitarfélaginu og við viljum vera þar sem viðskiptavinirnir okkar eru,“ segir Anný Björk Guðmundsdóttir, rekstrarstjóri nýrrar verslunar, í samtali við sunnlenska.is.
„Þarna ertu komin með vettvang fyrir fagfólk þar sem rafvirkjar, verktakar, veitufyrirtæki og pípulagnafólk geta fengið allt undir sama þaki, einnig verkfæri og allan vinnufatnað. Þetta er mikil búbót fyrir þessar stéttir á þessu svæði, að geta verslað allan sinn búnað í heimabyggð,“ segir Anný.
Veitingar, glaðningar og opnunartilboð
Að sögn Annýar verður viðskiptavinum boðið upp á veitingar og glaðninga í kringum opnun og vonast hún til að sjá sem flest fagfólk á staðnum í þessum nýju húsakynnum. „Við verðum með fjölda starfsmanna frá öðrum starfsstöðvum okkar til að þjónusta alla á sem bestan máta. Sindri verður einnig með glæsileg opnunartilboð allan mars svo nú er tilvalið að græja sig upp af verkfærum fyrir vorið.“
Afbragðs fagfólk af Suðurlandi hefur komið að byggingu hússins og undirbúnings. Jón Árni Vignisson, húsasmíðameistari hjá Árfossi, sá um bygginguna á þessu reisulega 1.330 fm límtréshúsi.
Fermetrafjöldinn þrefaldast
Johan Rönning hefur verið á Selfossi frá 2007 og alltaf á Eyrarveginum. „Í nýju verslunni höfum við þrefaldað fermetrafjöldann sem þýðir að við getum boðið upp á stóraukið vöruúrval og stærri lager. Við leggjum áherslu á að þróa vöruúrvalið í samráði við viðskiptavinina og þarfir markaðarins, það verður spennnandi að geta tekið það áfram,“ segir Anný.
„Við höfum frá upphafi státað okkur af framúrskarandi þjónustu, áreiðanleika og sérþekkingu og það verður ekkert lát á því,“ segir Anný að lokum en Johan Rönning mun fagna 90 ára afmæli á næsta ári.