D-listinn og óháðir í Skaftárhreppi hafa ákveðið að ráða Sigurjón Andrésson í starf sveitarstjóra Skaftárhrepps. Ráðningin verður formlega staðfest þegar ný sveitarstjórn tekur til starfa 9. júní nk.
Sigurjón býr yfir víðtækri reynslu af stjórnun, sveitarstjórnarmálum, stefnumótun og mannauðsmálum. Hann hefur gegnt starfi bæjarstjóra Sveitarfélagsins Hornafjarðar frá árinu 2022 og hefur jafnframt umtalsverða reynslu af verkefnastjórnun, breytingastjórnun og umbótastarfi.
Í sveitarstjórnarkosningunum 16. maí sl. hlaut D-listinn og óháðir 199 atkvæði og þrjá sveitarstjórnarfulltrúa kjörna, og þar með hreinan meirihluta í sveitarstjórn. Ö-listinn hlaut 121 atkvæði og tvo fulltrúa.
„Við erum afar ánægð með að Sigurjón hafi samþykkt að taka við starfi sveitarstjóra Skaftárhrepps. Reynslan og þekkingin sem hann býr yfir mun nýtast vel í þeim mikilvægu verkefnum sem fram undan eru,“ segir Sveinn H. Jensson, oddviti D-listans og óháðra.
Sigurjón segist hlakka til samstarfsins og verkefnanna fram undan. „Ég er bæði spenntur og þakklátur fyrir þetta tækifæri. Fram undan eru spennandi verkefni og ég hlakka til að vinna með íbúum, starfsfólki og sveitarstjórn að áframhaldandi þróun og uppbyggingu Skaftárhrepps.“