Sigurður Emil Pálsson sigraði í söngkeppni Nemendafélagsins Mímis, Blítt og létt, sem var haldin í íþróttahúsinu á Laugarvatni fimmtudaginn 29. október síðastliðinn.
Sigurður Emil söng lagið Stimpla mig út eftir Valdimar Guðmundsson. Þess má geta að þetta er annað árið í röð sem Sigurður Emil vinnur Blítt og létt.
Annað sæti skipaði Sara Nadía Gunnarsdóttir með lagið Ég sé þig eftir Björgvin Halldórsson í útsetningu Jóhönnu Guðrúnar. Í þriðja sæti var Bergur Tjörvi Bjarnason með lagið Lukkutroll með Ljótu hálfvitunum.
Skemmtilegasta atriði kvöldsins var í flutningi Bakkabræðra sem er rapptríó skipað af Gísla Guðnasyni, Eiríki Gylfa Janusyni og Guðjóni Inga Guðlaugssyni.
Dómarar kvöldsins voru Pálmi Gunnarsson, Unnur Malín Sigurðardóttir og Elva Rún Pétursdóttir. Þau afhentu sigurvegaranum Hljóðkútinn við dynjandi lófatak þeirra sex hundruð gesta sem voru í húsi.
Undirleikur var í höndum hljómsveitarinnar Stone Stones og kynnar kvöldsins voru þau Hjördís Katla Jónasdóttir og Ingvar Jökull Sölvason en þau luku námi við ML seinasta vor. Hljóð- og ljósastýring var í höndum EB-kerfa og var umgjörð og skipulag kepninnar í heild sinni í höndum nemendafélagsins Mímis að vanda. Yfirbragð keppninnar var í heild sinni hið glæsilegasta.
Sama dag og söngkeppnin fór fram bauð ML flestum 10. bekkingum á Suðurlandi í heimsókn í skólann þar sem þeim gafst tækifæri til að skoða skólann og ljúka svo deginum á Blítt og létt. Kynningardagskráin tókst einkar vel og vill skólinn þakka öllum þeim góðu gestum sem nutu dagsins á Laugarvatni.