Sigtún þróunarfélag kaupir Landsbankahúsið á Selfossi

Landsbankinn á Selfossi. Mynd úr safni.

Landsbankinn hefur tekið tilboði Sigtúns Þróunarfélags í Landsbankahúsið á Selfossi og var kaupsamningur þess efnis undirritaður í dag. Fjögur tilboð bárust og var tilboð félagsins hæsta gilda tilboðið.

Landsbankahúsið á Selfossi var reist á árunum 1949-1953, eftir grunnteikningum Guðjóns Samúelssonar, en áður hafði bankinn verið til húsa í Tryggvaskála og að Austurvegi 21. Húsið var auglýst til sölu í lok október sl. Fjögur tilboð bárust en fallið var frá einu þeirra. Söluverð hússins er 352 milljónir króna. Landsbankinn mun leigja hluta hússins undir starfsemi sína þar til útibúið flytur á nýjan stað á Selfossi.

„Þessi kaup eru liður í uppbyggingu okkar á Selfossi og undirstrikar þá sannfæringu sem við höfum fyrir framtíðarmöguleikum bæjarins. Húsið er stór hluti af sögu og bæjarmynd Selfoss og í því liggja mikil menningarverðmæti. Sigtún Þróunarfélag er meðvitað um varðveislugildi þess og mun leggja áherslu á að það haldi reisn sinni til framtíðar og að dyr þess verði áfram opnar Selfyssingum og gestum þeirra,“ segir Leó Árnason, stjórnarformaður Sigtúns þróunarfélags.

Að sögn Lilju Bjarkar Einarsdóttur, bankastjóri Landsbankans, er húsið á Selfossi orðið of stórt fyrir starfsemina. „Landsbankahúsið á Selfossi er fallegt og svipmikið hús sem tengist sögu bankans órjúfanlegum böndum. Vegna breytinga á bankaþjónustu er það hins vegar orðið of stórt fyrir starfsemina og það er tímabært fyrir bankann að flytja í nýtt og hentugra húsnæði. Sigtún Þróunarfélag vinnur nú að uppbyggingu á nýjum miðbæ á Selfossi af miklum myndarskap og mun félagið vafalaust finna húsinu nýtt og spennandi hlutverk,“ segir Lilja.