Á morgun, þriðjudag, býður Plokkvinafélag Zo•On öllum þeim sem hafa áhuga að koma með og plokka á milli klukkan 17 og 18 á Selfossi.
Þetta er síðasta plokkið í bili hjá Plokkvinafélaginu þar sem veður fer versnandi og daginn tekur að stytta. Hópurinn hlakkar til að taka fram tínurnar aftur þegar vorar eða um leið og veður leyfir.
Þaulvanur plokkari leiðir hópinn
Hópurinn hittist í verslun Emil&Lína og Zo•On við Larsenstræti og gengur þaðan í fylgd formanns félagsins, Elínar Birnu, en Elín er þaulvanur plokkari og leiðir hópinn að góðu plokksvæði. Engin skráning nauðsynleg og eru allir velkomnir. Fólk er þó eindregið hvatt til að gerast meðlimir í Plokkvinafélaginu.
„Við hvetjum foreldra sérstaklega til að mæta með börnin með sér og nýta tækifærið í samveru utandyra, og til að kenna börnunum mikilvægi þess að hugsa vel um umhverfið okkar,“ segir Jóna Alla Axelsdóttir hjá Zo•On í stuttu samtali við sunnlenska.is.
„Tínur og pokar verða á staðnum fyrir alla þátttakendur. Hreinsum umhverfið fyrir okkur og samfélagið allt, hugum að náttúrunni og höfum gaman saman,“ segir Jóna Alla enn fremur.
