Síðdegis í gær, um klukkan 17:30, barst Neyðarlínunni aðstoðarbeiðni frá gönguhóp sem var á leið yfir Fimmvörðuháls. Einn úr hópnum hafði veikst skyndilega.
Sjúkraflutningar HSU voru kallaðir út en staðsetning gönguhópsins og eðli veikindanna voru þannig að björgunarsveitir af öllu Suðurlandi, frá Selfossi að Vík voru einnig kallaðar út á mesta forgangi. Meðal annars voru kallaðir út fjallabjörgunarmenn frá Vestmannaeyjum, sem björgunarskipuð Þór sigldi með í Landeyjahöfn, og þaðan fóru þeir með bíl frá Dagrenningu á Hvolsvelli á vettvang.
Einnig var þyrluáhöfn Landhelgisgæslunnar kölluð út en talsverð þoka var á Hálsinum, lágskýjað og lítið skyggni, og ljóst að erfitt gæti verið fyrir þyrluna að athafna sig. Hún lenti því í Skógum og beið þess sem verða vildi.
Sjúklingurinn var í brattri brekku, skammt austur af Fimmvörðuskála, í ríflega 1.000 m.y.s. og voru fyrstu hópar komnir á staðinn rétt um klukkan 19. Þá var líðan sjúklingsins nokkuð stöðug en sjúkraflutningamenn hófu þegar að hlúa að viðkomandi. Um klukkustund síðar var búið að koma sjúklingnum niður bratta brekkuna og í björgunarsveitarbíl sem svo flutti hann niður af Hálsinum og að sjúkrabíl. Ekki var þörf á því að nota þyrluna í sjúkraflutninginn.
Á leiðinni til baka komu björgunarsveitir við í Baldvinsskála og sóttu ferðamann sem hafði orðið fyrir bakmeiðslum daginn áður en hafði ákveðið að gista í skálanum og meta stöðuna að morgni. Hann treysti sér ekki til frekari göngu.
Alls tóku rétt um 60 manns frá björgunarsveitunum þátt í aðgerðinni, sem var að mestu lokið um klukkan 22 í gærkvöldi.
