Sextán ára á 120 km/klst í „æfingaakstri“

sunnlenska.is/Guðmundur Karl

Lögreglan á Suðurlandi stöðvaði 16 ára dreng á tæplega 120 km/klst hraða skammt austan við Vík í Mýrdal á laugardag.

Móðir drengsins var í farþegasætinu og ungt barn í aftursætinu. Móðirin gaf þá skýringu að drengurinn væri í æfingaakstri en móðirin gat ekki framvísað neinum pappírum því til staðfestingar. Þá voru engar merkingar um æfingaakstur á bifreiðinni.

Móðirin greiddi hraðasektina á staðnum og var henni gert að taka við akstri bifreiðarinnar.

Um það bil fjórum klukkustundum síðar var sama bifreið stöðvuð aftur skammt vestan við Vík og var drengurinn þá aftur sestur undir stýrið. Í þetta skiptið var móðirin kærð fyrir að vera ekki með ökuskírteini meðferðis, geta ekki framvísað gögnum sem sýna fram á æfingaakstur drengsins og fyrir að vera ekki með æfingaakstursmerki á bifreiðinni.