Alls var 81 ökumaður kærður fyrir að aka of hratt í umdæmi lögreglunnar á Suðurlandi í liðinni viku og hafa nú 1.584 ökumenn verið kærðir í umdæminu það sem af er árs.
Af þessum ökumönnum voru fjórtán kærðir af lögreglumönnum við sérstakt eftirlit í Öræfum en þar hefur verið gerður út sérstakur bíll til að bregðast við mikilli umferð þar og þeirri staðreynd að 200 km eru á milli lögreglustöðva á Höfn annarsvegar og Kirkjubæjarklausturs hinsvegar.
Þrír voru kærðir við Vík, þrír á Kirkjubæjarklaustri og sautján af eftirliti gerðu út frá Hvolsvelli. Sérstakt eftirlit í uppsveitum Árnessýslu leiddi til þess að tveir voru kærðir fyrir hraðakstur þar.
Undir áhrifum fíkniefna á 135 km/klst hraða
Umferðareftirlitsdeild lögreglunnar kærði þrettán fyrir að aka of hratt en 27 voru kærðir fyrir of hraðan akstur af lögreglubílum frá Selfossi. Einn þeirra, stúlka um tvítugt, reyndist undir áhrifum fíkniefna þar sem hún ók bifreið sinni um Hellisheiði með 135 km/klst hraða þar sem leyfður hraði er 90 km/klst. Hún var færð á stöð til töku blóðsýna og í framhaldi af því svipt ökuréttindum til bráðabirgða.
Fimm aðrir reyndust undir áhrifum áfengis eða fíkniefna í umdæminu, einn var tekinn grunaður um ölvun á Höfn, annar á Selfossi, einn við Hveragerði, einn í uppsveitum Árnessýslu og einn var handtekinn grunaður um akstur undir áhrifum fíkniefna og/eða lyfja á Suðurlandsvegi austan við Hvolsvöll.
Álagðar sektir s.l. viku vegna umferðarlagabrota sem ljúka má með greiðslu greiðsluseðils nema um 5,6 milljónum í umdæminu. Um er að ræða 113 mál alls og af þeim kærðu bera rétt tæplega 40 % íslenska kennitölu.