Fimmtudagurinn 8. nóvember síðastliðinn var baráttudagur gegn einelti. Nemendur og starfsfólk í Þjórsárskóla tóku þátt í deginum og sögðu „stopp“ við einelti.
Nemendur höfðu allir fengið innlegg um Olweus og einelti og bjuggu í framhaldi af því til hendurnar sínar og skrifuðu inn í þær þeir hvað þeir geta gert sjálfir til þess að koma í veg fyrir einelti og byggja upp jákvæð samskipti. Starfsfólk skólans tók líka þátt. Hendurnar voru síðan settar upp á vegg og mynda saman orðið STOPP.
Um hádegi komu allir nemendur og starfsfólk skólans saman úti á skólalóðinni og í tilefni dagsins var vígður fallegur trjálundur og honum gefið nafnið „Vinaminni“. Staðurinn á að minna á mikilvægi vináttunnar og að koma vel fram við aðra. Þangað er hægt að fara í frímínútum og eiga góða stund með vinum sínum og vinkonum.
Stundinni lauk með því að allir tóku höndum saman utan um Vinaminni til þess að sýna samstöðu.