Segja nauðsynlegt að ríkið vinni með landeigendafélaginu

Héraðsdómur Suðurlands staðfesti í gær kröfu Bjarna Benediktssonar, fjármálaráðherra, á lögbann við gjaldtöku af gestum sem heimsækja Geysissvæðið.

Í tilkynningu frá Landeigendafélagi Geysis segir að niðurstaða Héraðsdóms leysi hins vegar ekki það sem málið í raun og veru snúist um, hvernig landeigendur að Geysissvæðinu geta unnið saman að uppbyggingu og verndun svæðisins.

„Ríkið er minnihlutaeigandi að Geysissvæðinu sem er í óskiptri sameign. Landeigendafélag Geysis var stofnað í september árið 2012. Ríkinu var boðið að vera með í stofnun þess en þáði ekki. Ríkið hefur ekki viljað hafa neitt samstarf við sameigendur sína en hefur frá stofnun félagsins verið upplýst um allar fyrirætlarnir þess,“ segir Bjarni Karlsson, formaður landeigendafélagsins.

„Tilgangur félagsins er fyrst og fremst að vernda svæðið og byggja upp aðstöðu sem tryggir öruggan aðgang ferðamanna og var gjaldtakan hugsuð til að mæta kostnaði við þær framkvæmdir. Uppbygging og verndun svæðisins til langframa er ómöguleg nema með samstarfi allra eigenda svæðisins. Ef það tekst ekki, tapar náttúran sem allir eru sammála að eigi að vernda. Bráðabirgðalausnir duga ekki til, lítill plástur er ekki settur á stórt svöðusár,“ segir Bjarni ennfremur.

Landeigendafélagið mun nú gefa sér tíma til þess að fara yfir dóminn og ákveða framhaldið. „Hvert sem svo það verður er ljóst að nú verður ríkið að hefja viðræður við okkur um framtíð Geysissvæðisins,“ bætir Bjarni við.