Sautján gómaðir á Sandskeiðinu

Lögreglan myndaði hraðabrot sautján ökumanna á Suðurlandsvegi við Sandskeið í dag. Fylgst var með ökutækjum sem var ekið í vesturátt.

Á einni klukkustund, eftir hádegi, fóru 216 ökutæki þessa akstursleið og því óku nokkrir ökumenn, eða 8%, of hratt eða yfir afskiptahraða. Meðalhraði hinna brotlegu var 102 km/klst en þarna er 90 km hámarkshraði. Sá sem hraðast ók mældist á 110.

Vöktun lögreglunnar á Suðurlandsvegi er liður í umferðareftirliti hennar á höfuðborgarsvæðinu.

Þess má geta að akstursskilyrði á Suðurlandsvegi í dag voru ekki góð, en þar var mikil rigning og vindur á meðan vöktunin stóð yfir.