Stórir viðburðir sem haldnir voru á Suðurlandi um síðustu helgi gengu vel fyrir sig og segir lögreglan tilefni til að hrósa mótshöldurum fyrir skipulag og gæslu – og gestum almennt fyrir sína framgöngu.
Landsmót hestamanna fór fram á Rangárbökkum í liðinni viku, á Helluflugvelli var flughátíð og á Selfossi var Kótelettan haldin. Margir voru á ferðinni í kring um þessi hátíðahöld og var umferðarþungi mikill.
Verulega var bætt í löggæslu vegna þessara viðburða og meðal aðstoðarliðs var fíkniefnahundur lögreglunnar í Vestmanneyjum. Leiddi þátttaka hans í gæslunni til þess að sautján fíkniefnamál komu upp. Þau varða öll vörslu og neyslu efna, ýmist kannabisefna, amfetamíns eða kókaíns.