Hann var heldur óheppinn ökumaður húsbíls sem reyndi að aka undir Ölfusárbrú á Selfossvegi síðdegis í dag. Veghæðin undir brúna er aðeins þrír metrar en húsbíllinn tuttugu sentimetrum hærri.
Því fór sem fór, bíllinn sat fastur undir brúnni og þurfti dráttarbíl til þess að koma honum undan brúnni. Ekki urðu slys á fólki og engar skemmdir á brúnni, en yfirbygging húsbílsins, sem er bílaleigubíll, er stórskemmd.
Lögreglan var á vettvangi þegar sunnlenska.is bar að garði og var Selfossvegur lokaður þangað til bíllinn var fjarlægður.
