Stjórn Samtaka sunnlenskra sveitarfélaga leggur mikla áherslu á að mörk umdæma lögreglustjóra og sýslumanna verði þau sömu og verði innan marka Suðurkjördæmis þ.e. nái frá Ölfusi í vestri og til Hornafjarðar í austri.
Þetta kemur fram í ályktun sem samþykkt var á stjórnarfundi SASS á dögunum vegna vegna umdæmamarka nýrra lögregluembætta:
„Mikilvægt er að samræmi sé sem mest á milli stjórnsýslueininga ríkisins á svæðinu, s.s. heilbrigðisstofnana og umdæma lögreglustjóra og sýslumanna og einnig að hagsmunaaðilar á þessu svæði geti leitað til þingmanna kjördæmisins með mál sem snerta málefni umdæma sýslumanna og lögreglustjóra,“ segir í ályktuninni.
Einnig bendir stjórnin á að SASS nær til þessa svæðis og eitt af mikilvægustu hlutverkum þeirra sé að gæta hagsmuna sveitarfélaganna og íbúa þeirra.
„Þá er mikilvægt að hafa í huga að sóknaráætlanir landshlutans ná til allra sveitarfélaga landshlutans og mjög mikilvægt að þær nái til allra málaflokka.“