Góðir Sunnlendingar. Vorið kom í dag! Tjaldaparið margfræga sem býr í Stóru-Sandvík í Sandvíkurhreppi lenti í Sandvík í morgun og er þá staðfest að veturinn er nánast úti hér sunnanlands.
Heyrst hefur til tjalda á flugi yfir Sandvík á liðnum dögum og frændur Sandvíkurtjaldsins eru mættir fyrir nokkru bæði á Stokkseyri, Selfoss og Laugarvatn. Það var hins vegar ekki fyrr en í morgun að sjálfur Sandvíkurtjaldurinn heilsaði upp á mannskapinn. Hann er einstaklega hávaðasamur, en um leið auðþekktur á því hversu greindarlegur hann er til augnanna.
Undanfarin ár hafa fuglaáhugamenn beðið spenntir eftir komu Sandvíkurtjaldsins og hefur komudagur hans verið skrásettur frá árinu 2007. Síðustu ár hefur hann seinkað sér nokkuð og lent um eða eftir 8. apríl. Í fyrra lenti hann 13. apríl.
Annars hefur fuglalífið í Sandvík talsvert rólegra en venjulega að undanförnu. Grágæsahópar hafa látið sjá sig, álftapör og stöku hrossagaukar og skógarþrösturinn er að sjálfsögðu mættur, heldur þreyttur eftir farflugið.