Hrunamannahreppur og ÁSÆL, áhugafélag um uppbyggingu sæluhúsa á Hrunamannaafrétti, skrifuðu á dögunum undir samning um viðhald gamalla sæluhúsa á afréttinum.
Skrifað var undir samninginn á aðalfundi ÁSÆL sem haldinn var á 20 ára afmælisdegi félagsins, þann 18. mars síðastliðinn.
Tilgangur samningsins er að viðhaldið verði þeim menningararfi sem felst í gömlum sæluhúsum á afrétti Hrunamanna og að viðurkennt sé mikilvægi sjálfboðinna starfa eins og þeirra sem félagar í ÁSÆL hafa sinnt með eftirtektarverðum hætti við uppbyggingu og viðhald sæluhúsa á afréttinum síðustu tvo áratugina
Félagar í ÁSÆL hafa byggt upp og endurnýjað að hluta eða að öllu leyti gömul sæluhús í Leppistungum, í Svínárnesi, í Fosslæk og í Mikluöldubotnum. Fosslækur hefur verið helsta stolt félagsins og snýr samningurinn ekki síst að viðhaldi þess skála sem og viðhaldi á gömlum torfhúsum í Svínárnesi og Leppistungum ásamt viðhaldi á nýju húsi í Mikluöldubotnum.
Samningurinn er í gildi í þrjú á og á samningstímanum skuldbinda félagar í ÁSÆL sig til að lagfæra torf á skálunum, bera á timburverk, klára framkvæmdir í Mikluöldubotnum, halda árlega opinn viðburð tengdum starfi félagsins og sjá til þess að umhverfi skálanna sé til sóma. Í staðinn greiðir Hrunamannahreppur félaginu 1.235 þúsund krónur á þeim þremur árum sem samningurinn gildir.
Á fundinum færði Hrunamannahreppur félaginu kamínu í 20 ára afmælisgjöf en vonir standa til að kamínan muni nýtast félagsmönnum sem og öðrum gestum í einum af skálunum á afréttinum.