Samfylkingin nýtur mests fylgis í Suðurkjördæmi í nýjasta Þjóðarpúlsi Gallup sem tekinn var í janúar. Fylgi Samfylkingarinnar er 26,4 prósent og er svipað og í síðasta mánuði.
Fylgi Miðflokksins heldur áfram að dala eftir hástökk í nóvembermánuði en Sjálfstæðisflokkurinn bætir við sig fylgi annan mánuðinn í röð. Flokkarnir hafa sætaskipti, Sjálfstæðisflokkurinn er nú næst stærstur í Suðurkjördæmi með 24,1 prósent og Miðflokkurinn er með 22,6 prósent.
Þar fyrir neðan bætir Viðreisn við sig fylgi, Viðreisn er með 7,7 prósent, Framsókn dalar talsvert, niður í 7,5 prósent og Flokkur fólksins bætir lítillega við sig og er í 6,7 prósentum.
Aðrir flokkar eru með mun minna fylgi; Vinstri grænir, Píratar, Sósíalistaflokkurinn og aðrir eru undir 2,1 prósentum.
Yrðu þetta niðurstöður Alþingiskosninga fengju Samfylkingin og Sjálfstæðisflokkurinn 3 kjördæmakjörna þingmenn í Suðurkjördæmi, Miðflokkurinn 2 og Viðreisn 1.
Gallup fékk 515 svör frá kjósendum í Suðurkjördæmi í netkönnun sem gerð var dagana 9. janúar til 1. febrúar og birtir sunnlenska.is niðurstöðurnar úr Suðurkjördæmi í samstarfi við RÚV. Einstaklingar í úrtaki voru handahófsvaldir úr Viðhorfahópi Gallup.