Fylgi Samfylkingarinnar tekur dýfu í Suðurkjördæmi samkvæmt nýjasta Þjóðarpúlsi Gallup, sem tekinn var í september, á meðan Miðflokkurinn tekur nánast jafn stórt stökk upp á við.
Þetta er fyrsti Þjóðarpúlsinn sem er tekinn eftir þjóðaratkvæðagreiðsluna um ESB í lok ágúst.
Sjálfstæðisflokkurinn er með 31,1 prósent fylgi og tapar tæpum tveimur prósentum. Þar á eftir kemur Miðflokkurinn með 24,7 prósent og bætir við sig tæpum 7 prósentum á milli mánaða. Fylgi Samfylkingarinnar minnkar um 7,6 prósent á milli mánaða og er nú 17,9 prósent.
Flokkur fólksins og Viðreisn bæta við sig
Framsókn er með svipað fylgi og áður, 8,2 prósent, Flokkur fólksins bætir við sig og er með 7,0 prósent og Viðreisn hækkar lítillega og er með 5,5 prósent fylgi.
Fylgi Vinstri grænna breytist lítið og er 2,8 prósent en Píratar, Sósíalistaflokkurinn og aðrir eru undir 1,2 prósentum.
Yrðu þetta niðurstöður Alþingiskosninga fengju Sjálfstæðisflokkurinn og Miðflokkurinn 3 kjördæmakjörna þingmenn í Suðurkjördæmi, Samfylkingin 2 og Framsókn 1. Viðreisn og Flokkur fólksins næðu ekki inn manni.
Gallup fékk 505 svör frá kjósendum í Suðurkjördæmi í netkönnun sem gerð var dagana 1. til 28. september og birtir sunnlenska.is niðurstöðurnar úr Suðurkjördæmi í samstarfi við RÚV. Einstaklingar í úrtaki voru handahófsvaldir úr Viðhorfahópi Gallup.
Á landsvísu
Helsta breyting á fylgi flokka milli mánaða er að fylgi Sjálfstæðisflokksins minnkar um 2 prósentustig. Litlar breytingar eru á fylgi annarra flokka milli mánaða, eða á bilinu 0-1,2 prósentustig. Nær 31% kysu Samfylkinguna ef kosið yrði til Alþingis í dag, næstum 25% Sjálfstæðisflokkinn, 15% Miðflokkinn, tæplega 11% Viðreisn, um 6% Framsóknarflokkinn, 4% Flokk fólksins, næstum 4% Vinstri græn, tæplega 3% Pírata og rösklega 2% Sósíalistaflokk Íslands. Ríflega 6% myndu skila auðu eða ekki kjósa og rösklega 11% taka ekki afstöðu eða vilja ekki gefa hana upp. Tæplega 49% þeirra sem taka afstöðu styðja ríkisstjórnina.