Samfylkingin mun bjóða fram lista í sveitarstjórnarkosningunum í Sveitarfélaginu Ölfusi í vor, lista Samfylkingarinnar og félaga. Þetta er í fyrsta sinn í 20 ár sem Samfylkingin býður fram í sveitarfélaginu.
Listinn var kynntur á opnum fundi á Heima Bistro í Þorlákshöfn í gærkvöldi en Kristrún Frostadóttir, formaður flokksins og forsætisráðherra, kynnti listann.
Oddviti listans er Gunnsteinn R. Ómarsson sem var bæjarstjóri í Ölfusi á árunum 2013 til 2018. Gunnsteinn er þó ekki mættur til leiks til þess að verða bæjarstjóri á ný því framboðið hefur gert samkomulag við bæjarstjóraefni utan listans, sem verður kynntur til leiks þegar nær dregur kosningum. Í tilkynningu frá framboðinu segir að um sé að ræða reynslumikla manneskju í sveitarstjórnarmálum.
Berglind Friðriksdóttir, sálfræðingur, sem nú situr í bæjarstjórn fyrir Íbúalistann er í 2. sæti, Pálmi Þór Ásbergsson, íþróttafræðingur og aðstoðarforstöðumaður, er í 3. sæti og Bryndís Sigurðardóttir, fyrrverandi sveitarstjóri Tálknafjarðarhrepps, skipar 4. sætið.
Á fundinum í gærkvöldi sögðu Gunnsteinn og Berglind frá helstu áherslumálum listans í komandi kosningum. Áhersla verður á að skipulagsmál í sveitarfélaginu taki mið af lífsgæðum íbúa og að ekki verði þrengt að hafnarsvæðinu, að vinna markvisst að því að rækta þorpsandann og velferð íbúa með ýmsum aðgerðum og byggja upp fjölbreytt og öflugt atvinnulíf. Þá kom einnig fram að efla á samstarf við íbúa um málefni sveitarfélagsins og styrkja samstarf við önnur sveitarfélög.
Listi Samfylkingarinnar og félaga er þannig skipaður:
1. Gunnsteinn R. Ómarsson, framkvæmdastjóri
2. Berglind Friðriksdóttir, sálfræðingur
3. Pálmi Þór Ásbergsson, aðstoðarforstöðumaður í sértækri félagsmiðstöð
4. Bryndís Sigurðardóttir, viðskiptafræðingur
5. Sigurður Freyr Vestmann Sigurvinsson, viðskiptafræðingur og ráðgjafi
6. Sigfús Benóný Harðarson, aðalvarðstjóri hjá ríkislögreglustjóra
7. Hrafnhildur Lilja Harðardóttir, sálfræðingur
8. Sylwia Dzwoniarska, túlkur og starfsmaður í leikskóla í fæðingarorlofi
9. Gunnar Sigurðsson, tölvunarfræðingur og bruggmeistari
10. Guðrún Bjarnadóttir, sjálfstætt starfandi við fræðslu og handverk
11. Helga Ósk Gunnsteinsdóttir, læknanemi
12. Hannes Gunnarsson, trésmíðameistari og eftirlaunamaður
13. Hjördís Erlingsdóttir, ritari á Heilbrigðisstofnun Suðurlands
14. Guðmundur Oddgeirsson, eftirlaunamaður og fyrrverandi hitt og þetta
