Hvorki E-listi eða G-listi, sem nú sitja í sveitarstjórn Grímsnes- og Grafningshrepps, munu bjóða fram í sveitarstjórnarkosningunum í vor.
Eins og fulltrúar E-listans greindu frá í október síðastliðnum munu þau ekki gefa kost á sér í komandi sveitarstjórnarkosningum. Það eru oddvitinn Ása Valdís Árnadóttir, varaoddvitinn Björn Kristinn Borg Pálmarsson og Smári Bergmann Kolbeinsson.
Heimildir sunnlenska.is herma að fulltrúar listanna beggja vinni nú að nýju, sameiginlegu framboði og er smíði framboðslistans á lokametrunum.
E-listinn hefur verið í meirihluta undanfarin átta ár en mjótt var á mununum í kosningunum 2022 þar sem aðeins munaði sex atkvæðum. E-listinn, Listi óháðra lýðræðissinna, fékk þá 51,0% og þrjá menn kjörna og G-listinn, Framboðslisti um framsýni og fyrirhyggju, 49,0% og tvo menn kjörna.
Fyrr í vikunni tilkynnti framboðið Betri sveit – fyrir okkur öll um að það myndi bjóða fram lista í komandi sveitarstjórnarkosningum í Grímsnes- og Grafningshreppi.
