Sett hefur verið af stað söfnun fyrir Andreu Eyland og börnin hennar en Andrea missti barnsföður sinn og ástmann, Þorleif Kamban, sviplega í nóvember síðastliðnum.
„Ég fór af stað með þessa söfnun af einlægri sannfæringu um að nú væri komið að því að gefa til baka. Andrea hefur í gegnum árin, meðal annars með starfi sínu innan Kviknar, haldið rými fyrir mæður og verðandi foreldra á viðkvæmum og mótandi tímum í lífi þeirra. Hún hefur veitt stuðning, hlýju og nærveru af heilum hug, án þess að ætlast nokkurs í staðinn,“ segir Erna Kristín Stefánsdóttir, ábyrgðarmaður söfnunarinnar, í samtali við sunnlenska.is.
„Þegar hún varð fyrir þessum skyndilega og sársaukafulla missi fannst mér mikilvægt að hún fyndi að hún stæði ekki ein. Slíkur missir hefur áhrif langt út fyrir sorgina sjálfa og snertir allt utanumhald daglegs lífs. Á slíkum stundum skiptir miklu máli að finna samstöðu og stuðning samfélagsins í kringum sig. Söfnunin er því leið fyrir okkur sem höfum notið góðs af og fyrir alla sem vilja sýna samkennd til að standa með henni, sýna þakklæti og miðla kærleika á erfiðum tímum. Þetta er einföld en einlæg tilraun til að bera hvort annað þegar mest á reynir.“
„Við vitum að mörg ykkar vilja hjálpa og því höfum við opnað styrktarreikning. Enginn styrkur er of lítill – margt smátt gerir eitt stórt og hver króna fer beint í að styðja við fjölskylduna, reka heimilið og mæta þörfum barnanna á þessum erfiðu tímum,“ segir Erna ennfremur.
Reikningsupplýsingar:
Reikningsnúmer: 0152-26-600019
Kennitala: 230391-2709
Ábyrgðaraðili söfnunarinnar er Erna Kristín Stefánsdóttir, eigandi reiknings.
