Þegar fréttist af eldsvoðanum í tónlistarhúsinu í Kulusuk á Grænlandi brugðust börnin á leikskólanum Heklukoti á Hellu skjótt við og hófu peningasöfnun til styrktar nágrönnum sínum á Grænlandi.
„Okkur langar að bregðast við með einhverjum hætti og höfum við því ákveðið að leggja í peningasöfnun frá 15. mars til 15. apríl. Við hvetjum alla þá sem eitthvað eiga aflögu að rétta fram hjálparhönd. Einnig eru dósir og flöskur vel þegnar,“ segir í tilkynningu frá umhverfisnefnd leikskólans. Börn í umhverfisnefnd og kennarar þeirra munu halda utan um söfnunina.
Minnt er á að margt smátt gerir eitt stórt.