Dugmikið sölufólk verður á ferðinni í verslunum og á bensínstöðvum víða um Suðurland næstu daga til að selja Álfinn frá SÁÁ.
Á Selfossi stýra þær Sigrún Ýr Magnúsdóttir og Klara Öfjörð Sigfúsdóttir Álfasölunni og sölufólkið kemur frá fimleikadeild Umf. Selfoss og 10. bekk Sunnulækjarskóla. Í Hveragerði sér Lionsklúbburinn Eden um söluna og í Þorlákshöfn, Stokkseyri og Eyrarbakka ætlar hópur af krökkum undir stjórn Sædísar Óskar Harðardóttur að töfra fram Álfinn. Og að sjálfsögðu verður Álfurinn einnig seldur á Hvolsvelli, Hellu og Kirkjubæjarklaustri og þar stýrir Ólafur Örn Oddsson sölumálunum.
Ein mikilvægasta fjáröflunarleið SÁÁ
Þetta er í 34. skipti sem SÁÁ stendur að Álfasölunni, sem er ein mikilvægasta fjáröflunarleið samtakanna. Að þessu sinni er Álfurinn í gervi töframanns, sem er afar viðeigandi í ljósi þess að Álfasala SÁÁ hefur stuðlað að töfrum í lífi þeirra þúsunda sem hafa komið í meðferð hjá samtökunum gegnum árin. Að ekki sé talað um töfrana fyrir aðstandendur, vini, vinnuveitendur og þjóðfélagið allt.
Tekjurnar af Álfasölunni hafa einkum verið nýttar til að byggja upp rými og þjónustu fyrir ungt fólk og aðstandendur alkóhólista. Sú mikla uppbygging sem SÁÁ hefur staðið fyrir í tæp 45 ár byggir alfarið á fjárhagslegum stuðningi landsmanna, sem hafa ávallt tekið vel í fjáraflanir samtakanna, ekki síst Álfinn.
Í heildina munu um 500 manns bjóða Töfra-Álfinn til sölu næstu daga á fjölförnum stöðum um land allt.