Sá slasaði ók bílnum

Mennirnir tveir sem handteknir voru í fyrrinótt upplýstu við yfirheyrslur hjá lögreglu í gær að þriðji maðurinn, sem slasaðist alvarlega, hafi ekið torfærubíl sem valt við Flúðir þá um nóttina.

Sá slasaði er ekki í lífshættu en hann brotnaði illa í andliti að sögn lögreglunnar á Selfossi. Mennirnir, sem eru á fertugs- og fimmtugsaldri, voru allir ölvaðir.

Þeir voru þrír í tveggja sæta bíl og á vettvangi neituðu þeir að upplýsa um hver ók og hver tildrög slyssins voru. Þeir tveir sem slösuðust ekki voru því handteknir.

Í ljós hefur komið að mennirnir ollu töluverðum gróðurskemmdum í hlíðunum fyrir ofan sumarbústaðahverfið þar sem slysið átti sér stað.