Í morgun um klukkan 11 var björgunarsveitin Víkverji í Vík í Mýrdal kölluð út vegna rútu sem hafði lent út af þjóðvegi 1 við Reynisfjall og hafnað ofan í skurði.
Enginn um borð í rútunni slasaðist en rútan var ekki í ökuhæfu ástandi og flytja þurfti fólkið í skjól í Vík í Mýrdal.
Í tilkynningu frá Landsbjörgu gengu aðgerðir gengu vel og voru allir fluttir í húsnæði Icewear í Vík þar sem fólkið fékk skjól. Rútan var skilin eftir í skurðinum.
Víkverji þurfti einnig að aðstoða tvo rútubílstjóra sem lentu í vandræðum við Pétursey og var bílunum komið aftur upp á veg og enginn slasaðist.