Lítil rúta hafnaði utan vegar og valt á hliðina austan við Kirkjubæjarklaustur fyrir hádegi í dag.
Sjö voru um borð í rútunni og voru þeir fluttir á heilsugæslu HSU á Klaustri. Meiðsli fólksins voru talin minniháttar.
Suðurlandsvegur var lokaður vegna veðurs og ófærðar í morgun frá Vík og austur í Freysnes. Nú er búið að opna milli Víkur og Klausturs en þæfingsfærð og skafrenningur er á veginum.
Samkvæmt upplýsingum frá lögreglunni er víða mikil hálka í umdæminu og til dæmis hafa bílar farið útaf veginum á Hellisheiði og í Kömbum í dag. Fólk sé hvatt til að fara varlega.