Síðdegis á laugardag hafði lögreglan á Suðurlandi afskipti af rútubílstjóra við Seljalandsfoss sem var með farþega á vegum rússneskrar ferðaskrifsofu.
Bílstjórinn var rússneskur og hafði þann starfa að aka hópum á vegum ferðaskrifstofunnar um Ísland. Ekkert rekstrarleyfi var til staðar. Ökmaður var ekki með ökuritaskífu í ökurita rútunnar og hann ekki með ökuréttindi til aksturs í atvinnuskyni á Íslandi.
Ökumaðurinn var handtekinn og færður til yfirheyrslu á lögreglustöðinni á Selfossi. Að henni lokinni féllst hann á lögreglustjórasátt sem fólst í 65.000 króna sekt.
Að því loknu var hann frjáls ferða sinna en annar bílsjóri sá um að aka rútunni með farþegunum til Reykjavíkur en þeir áttu að fara í flug síðar um kvöldið.
Í gær var ökumaður staðinn að því við Gullfoss að aka með erlenda ferðamann í leigubíl í atvinnuskyni án réttinda og auk þess að hafa ekki fullgild ökuréttindi til aksturs leigubíls. Ökumaðurinn var færður í lögreglustöð til yfirheyrslu.
Í dagbók lögreglunnar kemur fram að svo virðist sem nokkuð vanti uppá að þeir sem stunda akstur með farþega hafi gild hópferða- og rekstrarleyfi eða ökumenn með ökurita í lagi. Sex voru kærðir í liðinni viku fyrir brot af þessu tagi.
Þess má geta að í tilvikum sem kært er vegna ökurita að þá er ökumaður og umráðamaður kærðir og refsing umráðamanns þyngri en ökumanns.