Ársreikningur Sveitarfélagsins Árborgar fyrir árið 2022 var lagður fram til fyrri umræðu á fundi bæjarstjórnar í dag. Samkvæmt samanteknum rekstrarreikningi A og B hluta var rúmlega 3,1 milljarða króna tap á rekstri sveitarfélagsins en í fjárhagsáætlun var gert ráð fyrir rúmlega 2 milljarða króna tapi.
Vega þar þyngst fjármagnsgjöld sem eru 991 milljónum króna umfram áætlun, sem rekja má til hærri verðbólgu en áætlun gerði ráð fyrir.
Árið einkenndist af ört hækkandi verðbólgu sem leiddi til aukins rekstrarkostnaðar og aukins kostnaðar vegna verðbóta af langtímalánum. Kostnaður vegna verðbóta nam rúmlega 2 milljörðum króna eða rúmlega 847 milljónum króna meira en gert var ráð fyrir í fjárhagsáætlun.
Tekjur Árborgar á árinu 2022 námu tæplega 15,3 milljörðum króna, launakostnaður var rúmir 9 milljarðar króna og hækkun lífeyrisskuldbindinga nam rúmum 95 milljónum króna. Annar rekstrarkostnaður var rúmir 5,7 milljarðar króna og nemur framlegð af rekstri A- og B-hluta samtals 437 milljónum króna. Afskriftir voru 831 milljónir og var
rekstrarniðurstaða fyrir fjármagnsliði neikvæð um 394 milljónir króna.
Fjármunatekjur, fjármagnsgjöld og tekjuskattur námu rúmum 2,7 milljörðum króna og var rekstrarniðurstaða ársins því neikvæð um rúman 3,1 milljarð króna eins og áður sagði. Veltufé frá rekstri var 70,7 milljónir króna eða 0,46% af tekjum.
Skuldaviðmið komið í 158,4%
Skuldahlutfall hefur hækkað á árinu 2022 vegna fjárfestinga og aukinnar verðbólgu og er nú komið í 158,4% miðað við 138,5% árið 2021. Sveitarfélagið hefur sett sér markmið með það að leiðarljósi að uppfylla að lágmarki kröfur sem kveðið er á um í lögum og standast lágmarksviðmið Eftirlitsnefndar með fjármálum sveitarfélaga. „Til þess að það náist þarf að beita blöndu af aðgerðum sem ná til allra þátta í starfsemi sveitarfélagsins,“ segir í tilkynningu frá sveitarfélaginu.
Samstaða um markmið og nauðsynlegar aðgerðir
Eins og fram hefur komið í fréttum hefur bæjarstjórn Árborgar unnið með ráðgjöfum KPMG að fjárhagslegum markmiðum og stefnu næstu ára í þeim tilgangi að ná tökum á fjármálum sveitarfélagsins. Bæjarstjórn hefur auk þess gert samkomulag við Innviðaráðherra um fjárhagslegar aðgerðir og eftirlit sem gildir til apríl 2025. Aðgerðaráætlunin nefnist „Brú til betri vegar“ en við gerð hennar hefur bæjarstjórn og stjórnendur sveitarfélagsins unnið sameiginlega að því að greina fjármál og rekstur sveitarsjóðs og B-hluta fyrirtækja, með aðstoð ytri ráðgjafa.
„Mikil vinna hefur þegar farið fram og áhersla hefur verið lögð á að tryggja sameiginlegan skilning á stöðunni, sem og samstöðu kjörinna fulltrúa og stjórnenda um markmið og nauðsynlegar aðgerðir. Íbúar hafa verið upplýstir um stöðuna, fengið tækifæri til að tjá sín sjónarmið og leggja fram tillögur til úrbóta,“ segir í tilkynningu frá sveitarfélaginu.
„Aðgerðaáætlunin er lifandi skjal og munu stjórnendur sveitarfélagsins og kjörnir fulltrúar fylgjast reglulega með framgangi aðgerða og gera viðeigandi breytingar eftir því sem verkefninu vindur fram. Þar sem enn ríkir talsverð óvissa, í efnahagsumhverfinu og starfsemi sveitarfélagsinser því ljóst að sveitarfélagið þarf að leita allra leiða til að auka tekjur og lækka útgjöld. Þar þarf að horfa til frekari forgangsröðun fjárfestinga, hagræðingar í rekstri og nýtingu þeirra tekjustofna sem sveitarfélaginu er heimilt að nota,“ segir ennfremur í tilkynningunni.