Atvinnuvegaráðuneytið úthlutaði í dag styrkjum til átján verkefna úr Framkvæmdasjóði ferðamannastaða fyrir árið 2026. Þar af eru fjögur verkefni á Suðurlandi sem fá samtals rúmlega 76 milljónir króna í styrk.
Heildarfjárhæð styrkja nam nær 490 milljónum króna sem dreifast til verkefna víðsvegar um landið.
Reykjadalsskálinn slf. fékk hæsta styrkinn á Suðurlandi, rúmlega 40,3 milljónir króna til endurbóta á Reykjadals gönguleiðinni í Ölfusi. Breyta á legu stígsins, loka eldri stíg, gera vatnsrásir og dren og einnig að gera fljótandi stíga og setja upp öryggismerkingar við hverasvæðið. Það er gert til að tryggja öryggi gesta og vernda viðkvæm hverasvæðin við þessa fjölsóttu gönguleið.
Rangárþing ytra fær 28 milljón króna styrk til að bæta aðstöðu við Sigöldugljúfur, sem nýtur vaxandi vinsælda meðal ferðamanna á hálendingu. Auka á öryggi á svæðinu, útbúa varanlegt bílastæði, gönguleiðir og setja upp viðvörunar- og upplýsingaskilti.
Ferðafélag Íslands fékk tvo styrki, annars vegar 5,2 milljónir króna til að setja upp leiðbeiningar-, varúðar og fræðsluskilti á Laugaveginum, vinsælustu gönguleið landsins, og hins vegar 2,5 milljónir króna til að smíða þriðju hreyfanlegu brú félagsins yfir Krossá, til að tryggja enn frekar öryggi fólks í Þórsmörk.