Ríkisstjórnin styrkir skákhátíð á Selfossi

Í Fischersetrinu á Selfossi. sunnlenska.is/Guðmundur Karl

Ákveðið var á ríkistjórnarfundi í morgun að veita fjögurra milljón króna styrk af ráðstöfunarfé ríkisstjórnar til alþjóðlegrar skákhátíðar og skákmóts á Selfoss sem fram fer dagana 19.- 29. nóvember næstkomandi.

Aðalviðburður hátíðarinnar verður skákmót tíu heimsmeistara en allir þátttakendur hafa orðið heimsmeistarar í skák í einhverjum flokki. Þá verður einnig haldið barna- og unglingaskákmót, Fischer-slembiskákmót, raðskákmót og fjöltefli, auk málþings um stöðu skákíþróttarinnar á Íslandi.

Á Selfossi er starfrækt Fischersetur en markmið þess er að halda á lofti minningu skákmeistarans Bobby Fischer sem tengdist Íslandi miklum vináttuböndum eftir einvígi sitt við Boris Spassky í Reykjavík árið 1972.