Reza Mirza, sem hefur starfað sem forstjóri Icelandic Glacial í Bandaríkjunum síðustu átta ár, tók við sem forstjóri eignarhaldsfélagsins Icelandic Water Holdings, þann 1. september síðastliðinn.
„Reza hefur á starfsferli sínum hjá fyrirtækinu markað langtímastefnu og framfylgt henni með ágætum. Hann hefur laðað til fyrirtækisins starfsmannateymi á heimsmælikvarða, sem stendur að baki miklum vexti og aukinni arðsemi fyritækisins. Icelandic Glacial fæst nú á 54.000 sölustöðum í Bandaríkjunum; á 400 lúxushótelum og nær öllum flugvöllum. Áhersla Reza á að byggja upp úrvalsteymi hefur skapað framúrskarandi fyrirtækjamenningu og byggt upp vörumerkið, þannig að það er nú þriðja stærsta innflutta „premium water“ á Bandaríkjamarkaði,“ segir Jón Ólafsson stjórnarformaður Icelandic Water Holdings.
„Ég hef fulla trú á að Reza leiði eignarhaldsfélagið inn í framtíðina, með ástríðu og drifkrafti, sem flýtir fyrir frekari vexti og arðsemi,“ bætir Jón við.
Reza segir sjálfur að það sé heiður fyrir hann að fá að gegna auknu hlutverki í að leiða Icelandic Water Holdings og samstæðufélög.
„Ásamt stofnendum fyrirtækisins, Jóni og Kristjáni, er ég spenntur fyrir framtíðinni, þar sem við munum halda áfram að byggja upp Icelandic Glacial á heimsmarkaði. Eins og við höfum gert í Bandaríkjunum, stefnum við að því að vera meðal fyrirtækja á markaði af „premium“ vatni, á öllum okkar mörkuðum á alþjóðavísu. Við erum með einstakt vörumerki, öflugt teymi og ört vaxandi tryggan hóp viðskiptavina og okkar dýrmætu uppsprettulind í Ölfusinu, sem skilar okkur hreinasta vatni í heimi,“ segir Reza Mirza.