Lögreglan á Suðurlandi kærði 31 ökumann fyrir að aka of hratt í liðinni viku.
Einn þeirra reyndist að auki með útrunnin réttindi en hraði bifreiðar hans mældist 130 km/klst þar sem leyfður hámarkshraði er 90 km/klst á þjóðvegi 1 um Mýrdalssand.
Öðrum, ungum ökumanni á bráðabirgðaskírteini, var gert að sæta akstursbanni þar sem að punktafjöldi hans fór upp fyrir fjóra punkta. Hann þarf því að sækja sérstakt námskeið áður en hann getur hafið akstur á ný.
Af þessum 31 ökumanni eru 18 í Árnessýslu, fimm í Rangárvallasýslu, sex í V-Skaftafellssýslu og tveir í A-Skaftafellssýslu.
Fjórir ökumenn voru í liðinni viku kærðir fyrir að nota farsíma við akstur bifreiða sinna á og við Selfoss.