Um síðustu helgi var réttað í Klausturhólaréttum í Grímsnesi í fyrsta skipti eftir endurbyggingu.
Framkvæmdir hafa staðið yfir í sumar við að rífa gömlu steinsteyptu réttina, sem byggð var árið 1956, og byggja nýja glæsilega rétt úr timbri. Jarðvinnu vegna réttanna annaðist JÞ Verk, en Smiðsholt sá um byggingu þeirra.
Framkvæmdin þykir einstaklega vel heppnuð, en það voru votir en kátir smalar sem smöluðu í fyrsta skipti inn í réttina eftir smalamennsku helgarinnar.
Sóknarpresturinn, séra Kristín Þórunn Tómasdóttir, mætti og blessaði réttina áður en rekið var inn, og var smölum ásamt gestum og gangandi boðið upp á kaffi, köku og kræsingar í boði Grímsnes- og Grafningshrepps og fjallskilanefndar.
