Rekstrarafkoma Sveitarfélagsins Árborgar árið 2025 er eins sú besta í fjölda ára. Í fréttatilkynningu frá Braga Bjarnasyni, bæjarstjóra, segir að ábyrg fjármálastjórn, aðgerðir til hagræðingar á undanförnum árum og auknar tekjur sem, m.a. skýrast af íbúafjölgun og framlögum frá Jöfnunarsjóði, séu meginskýring jákvæðrar
niðurstöðu ársreiknings sem lagður var fram í bæjarstjórn Árborgar í gær.
Rekstrarniðurstaða A- og B-hluta er jákvæð um 1.497 milljónir króna en áætlanir gerðu ráð fyrir um 67 milljóna króna niðurstöðu. Rekstrarniðurstaða A-hluta var jákvæð um 620 milljónir króna en áætlanir gerðu ráð fyrir um 525 milljón króna neikvæðri niðurstöðu. Um er að ræða eina bestu rekstrarniðurstöðu sveitarfélagsins frá upphafi sem kemur verulega á móti hallarekstri undanfarinna ára.
Veltufé frá rekstri helst stöðugt milli ára og er um 3.646 milljónir króna og handbært fé eykst um tæpan milljarð króna á milli ára og endar í 3.287 milljónum króna í A- og B-hluta.
„Niðurstaða ársreikningsins er mjög ánægjuleg og vil ég óska íbúum, starfsmönnum og kjörnum fulltrúum til hamingju með árangurinn. Það er ánægjulegt að erfiðar aðgerðir undanfarin þrjú ár sem hafa verið þungar fyrir okkur íbúa skili árangri á skemmri tíma en áætlað var. Lausafjárstaða sveitarfélagsins styrkist og skuldaviðmið lækkar milli ára þrátt fyrir umfangsmiklar fjárfestingar og viðhald innviða. Stefna bæjarstjórnar Árborgar var að taka á rekstrarvandanum með ábyrgum hætti og það er að takast. Við munum áfram sýna ábyrgð í rekstrinum með það að markmiði lækka álögur á íbúa, t.a.m. fasteignagjöld. Íbúar eiga alltaf að njóta ávinningsins af betri rekstri m.a. í formi lægri gjalda og álaga,“ segir Bragi í fréttatilkynningunni.
Skuldaviðmið lækkar í 108,8%
Skuldir við lánastofnanir lækka í heildina milli ára en heildarskuldir og skuldbindingar aukast lítillega vegna hækkunar lífeyrisskuldbindinga. Skuldaviðmið lækkar í 108,8% sem er frábær árangur og er Árborg komið vel undir lögbundið hámark sem er 150% samkvæmt sveitarstjórnarlögum.