Regnbogafánar sem flaggað hafði verið í miðbæ Hellu í tilefni af Hinsegin dögum í síðustu viku voru skornir niður aðfaranótt mánudags.
Skorið var á fánalínur á átta eða níu fánastöngum og fánarnir látnir liggja en einhverjir fánanna voru líka skemmdir og einn þeirra fannst í ruslatunnu í nágrenninu.
Eggert Valur Guðmundsson, oddviti sveitarstjórnar, sagði í samtali við sunnlenska.is að samfélagið væri slegið yfir þessum dapurlega verknaði. Málið hafi verið tilkynnt til lögreglu og talsverðar líkur séu á því að gerandinn hafi náðst á mynd í eftirlitsmyndavélum.
